Lusmakers vir die jagseisoen

[Koos Barnard]

Dagsê
Daar is deesdae so baie advertensies op Jaracal (en ek is self skuldig want ek het 'n paar goed gesmous hier) dat ek dit goed gedink het om enkele jagfoto's te plaas. Net miskien help dit om julle jaglus vir hierdie jaar verder aan te wakker.

Die njala is in Noord-Natal geskiet met my .375 H&H. Hierdie jag het in die middel van die somer plaasgevind en die son het my omtrent gelooi. Dit was 'n lekker opwindende jag want ek was alleen en daar kom vrylopende buffels, olifante, renosters en leeus op die plaas voor. Die bul se horing het net oor die 30" gemeet na die uitdroogperiode.

Ek het die bosbok op oud-Springbok Hennie le Roux se plaas naby Grahamstad geskiet met my .30-06. Ek het die vorige middag gesien dat drie of vier ramme (kan nie meer so mooi onthou nie) op 'n ouland langs 'n digte bosstrook gewei het. Vroeg die volgende oggend is ek toe soontoe, hopende dat 'n ram sy lyf sou kom wys om in die vroeë son te baai. Gelukkig het hierdie ram saamgespeel en kon ek hom toe skiet.

Die springbokram is op swaer Piet Mostert se plaas in Suidwes geskiet met my .243. Ek het die bok in 'n groot kalkpan voorgesit en 'n baie lang tyd daar spandeer terwyl hy stadig maar seker al nader aan my beweeg het. Dit was later sterk skemer en ek het gewonder of hy naby genoeg sou kom dat ek hom kon skiet. Toe hy uiteindelik 175m van my af was, het ek hom met 'n frontale nekskoot platgeskiet. Al die springbokramme wat ek daardie jaar op my swaer se plaas geskiet het, se skoon karkasse het tussen 26 en 29kg geweeg.

[Koos Barnard]

Nog 'n paar foto's:

Hierdie elandkoei is naby Barkley-wes in die Noord-Kaap geskiet met my .375 H&H met ghost-ring visiere.

Die hartbees is op dieselfde plaas geskiet. Nadat ek 'n dag of twee tevore 'n gemsbok en blouwildebees met my .30-06 geskiet het, het Katte Katzke (die persoon wat oorspronklik die Big Bore-vereniging is SA begin het, my uitgedaag om verder net met my .375 en oopvisiere te jag. Ek skiet toe die eland, hartbees, 'n springbokram en twee blouwildebeeste met die .375

My .30-06 (weereens met die Boydskolf) het gesorg vir hierdie koedoebul naby Musina in Limpopo. Hom het ek op kortafstand (seker so 5o tot 60m) met 'n skoot tussen die oog en linkeroor doodgeskiet. Ons was op pad met die jagkar toe die bul oor die pad draf. Ons het 'n ver ent verby die plek gery en toe is ek te voet terug tot waar sy spoor gewys het hy oor die pad is. Daar was 'n gids saam met my maar ek het hom gevra om agter my te stap. Ons is toe die digte bos in (voetjie vir voetjie). Na 'n hele ent het ons 'n horing teen 'n tak hoor klap soos die bul aan 'n bos gewei het. Ek is toe vorentoe op die geluid af totdat ek die bul geskien het. Hy was so besig om aan die boom te vreet dat hy my glad nie gewaar het nie. Later het hy 'n paar treë na links gestap om aan 'n ander boom te vreet ek dis toe dat ek hom kon skiet. Ongelukkig kan ek nie uit my kop onthou wat die bul geweeg het nie.

[tripodmvr]

Netjies en dankie vir die jaglus aanwakker.

[Lategan1]

Dankie Koos, mooi diere. Verseker ‘n lekker lusmaker!

Beste.

[Jassie]

Koos, jy kan maar enige tyd laat waai met die stories, moenie terughou nie.

Ek het weer my ou Magnum versameling ontdek en kry dit nou nie weer lekker weggepak nie.

Goeie tye

[RUPERT]

Altyd lekker Oom Koos

[partner]

Baie dankies Koos. Vir deel van Jagstories en Fotos. Sal nog waardeer.

[Arnold]

Baie dankie Koos, regtig lekker om hierdie te sien tussen al die advertensies

[DaavG]

Thanks for the post! It definitely got the blood flowing!

[Geno]

Lekker Oom Koos! Ek wil ook graag nog oopvisier met my .416 jag!

[Frederik]

Lekker gejag daar en mooi diere tussen hulle.

Net 'n regstelling in jou woorde Katte Katze was die eerste Voorsitter van BASA en stigterslid daar was meer manne betrokke aan die stigting van BASA ingesluit Katte.

Jammer oor sy skielike dood.

[Koos Barnard]

Dankie Frederik vir die regstelling. Ek was bewus daarvan dat daar meer manne betrokke was. Katte se storie aan my was dat hy dit geïnisieer het. Skuus as ek dalk ander stigterslede te na gekom het.

[Frederik]

Dankie Frederik vir die regstelling. Ek was bewus daarvan dat daar meer manne betrokke was. Katte se storie aan my was dat hy dit geïnisieer het. Skuus as ek dalk ander stigterslede te na gekom het.

Geen probleem en baie van die manne is ongelukkig nie meer saam met ons nie.