Sy aansoek is in en dit sloer maar soos gewoonlik. Met al die opgewondenheid begin ons oor buffel jag praat en die man het my aan die soek en soek toe ook self. Ek kry so paar opsies vir koeie en hy kom toe op ñ uitstekende winskoop vir ñ buffel bul naby Riversdale (aan die Ladysmith kant van die berg). Hy en die boer praat en die bul is geboek.
Sy kaartjie sloer, maar toe die kaart land is hy op die vliegtuig en oppad Pretoria toe om die roer te gaan haal. Hy is toe aan die skiet en lading ontwikkel en nou moet ons datums vasmaak. Ons bespreek toe vir die Maart vakansie en ek en my gesin ry die Vrydag die 20ste sommer reg deur van hier af. 1450km vêrder. Oor die naweek is al wat mens hoor Corona, maar ons fokus net op die jag, en is toe Maandag oggend daar weg na die jagplaas. Net ek en my neef en ñ jongman van die plaas, geen PH of niks.
Gou die gewere se zero gaan bevestig en toe begin rond ry om te kyk of ons die uitskop bul kan opspoor. Ek het nie geweet wat om van die veld te verwag nie, hierdie is harde wêreld, fynbos en proteas, hier en daar doring bome en vleilande vol riete, skielik besef ons hierdie gaan nie net maklik wees nie. So groot soos ñ buffel is so maklik verdwyn hulle ook. Berge en dale, klipperige grond en fynbos al 1000ha van die wildskamp. Ons spandeer seker 5 ure en spoor die buffel trop op, maar nie dié bul nie. Volgende oggend help almal soek, want die tyd is min en mens beweeg stadig op die plaas weens die klippe. Die boer fluister in my oor van die lockdown wat aangekondig is en ek word senuweeagtig, maar jag jag ons. Ons het ñ hele stuk waar hy gereeld gesien is op die voet deurgekam maar niks gekry. Later die dag het hulle hom gesien en ons is in daai rigting. Ons het toe weer op die voet begin soek in die area, en gewaar toe op ñ stadium 2 horing punte waar die man lê onder ñ bos. Die wind was gunstig, en ons bekruip stadig nader, op 50m is die manne reg en ek sê toe nee kom nader. Ons beweeg toe stadig tot op 30m. Ek bulk toe om die bul te probeer wakker kry, maar dit werk nie, toe breek ek ñ stukkie tak af en gooi dit na hom, hy speel toe saam en spring op en draai na ons en staar na ons nes ñ buffel kan! Daar is toe ñ gebrande boom stomp voor sy hart area en ek probeer nog planne maak toe die skoot klap! Die buffel val soos ñ sak patats en ek dog toe op ñ bladskoot is dit moeilikheid! Ek skree kom en skiet weer. Neef hol toe voor en by hom gekom sê ek toe skiet weer! Deur die rug. Hy wou nog stry toe sê ek skiet! Hy skiet toe nog ñ skoot deur die ruggraat.
Dis toe dat ek hom vra waar sit sy eerste skoot en hy my inlig dat hy hom in die kop net bo die neus geskiet het! Dit na ek die heeltyd vir hom sê net bang ouens skiet buffels in die brein met die eerste skoot
Welgedaan neef, was ñ voorreg vir ons eerste jag saam!
Ons het die volgende oggend vroeg moes laai en terug Mosselbaai toe, waar ek toe weer my bakkie gelaai en terug gery het huistoe. Was darem Donderdag net betyds voor die lockdown.
