Vrygewige Vrystaat Vlaktes

[Mellies]

Die rol doringdraad vanaf Antarktika wat die suidelike deel van Afrika met mening afkoel se kloue is nog behoorlik aanvoelbaar met die hilux se termometer wat tot -9°C daal tussen Viljoenskroon en Kroonstad.

Vier ure later is ek en Skillie op die plaas en kry ons gereedskap reg vir die namiddag se sessie wat voorlê. Minute later sluit Sniper by ons aan en ons kies koers skietgat toe om te bevestig alle roere skiet waar hulle moet.

By die eerste kamp bevestig die eienaar, Albertus, dat ons slegs ou blesbokooie moet afhaal. Aangesien daar `n paar seisoene gelede laas in hierdie spesifieke kamp gejag is, is die bokke relatief mak.

Minute nadat ek die voertuig verlaat het val die eerste ooi. Met `n mengelmoes van opgewondenheid, adrenalien en selfvertroue, laat ek na om die geniepsige suidewind in ag te neem en die maklike skoot verander in `n kwesskoot. Ou Lelik, my super akkurate .243, wat 88gr berger punte teen 3330 voete spoeg tel net sy skouers op en sê: `Moenie na my kyk nie, ek doen slegs wat jy sê`. Verbeel jou…

Gelukkig is Skillie aan my regterkant, ook met `n .243 wat 95gr nosler ballistic tips verkies, en hy verlos die kwesbok met `n manjefieke hardloop skoot. Deur die teleskoop sien ek duidelik hoe die koeël vir ouma tref, haar bene onder haar invou en sy letterlik gat-oor-kop tussen die geel gras verdwyn.

Te voet volg ek die trop blesbokke en kry gou-gou weer kans op 150m. Met die wind nou reguit van agter kompenseer ek niks en nog `n blesbok is plat. Al wat Lelik kwyt raak is: `Sien jy nou? Dit is jy, nie ek nie`. Die trop verdwyn oor `n rant en Sniper se .270, gelaai met 130gr nosler ballistic tips, verras nog `n ooi. Intussen skiet Albertus `n ooi tussen heuphoogte gras en bosse en `n skattejag van meer as `n uur volg om die ou blesbokooi te vind.

Met `n wye draai is die blesbokke almal in die rigting van Skillie se sitplek en kom tot stilstand reg voor hom. Op minder as 50m sak `n ooi in haar spore, met die res van die trop wat net rustig wegstap van die geraas af. Skillie swenk vinnig na regs en is weereens suksesvol. Die blesbokke draf weg en gaan staan in `n leegte regs van Sniper. Oomblikke later is hy in posisie en ek sien deur die verkyker hoe die trop uitmekaar spat toe nog `n ooi val, met die .270 se blaf wat my eers `n sekond of twee later bereik.

`n Suksesvolle agtermiddag met sewe blesbokke in totaal sodat die getal bekke en die kamp se weidingskapasiteit weer in balans is.
Op dag twee is ons reeds met sonop die volgende kamp binne en uit onderving weet ek dit kan `n lang dag raak in hierdie spesifieke kamp met blesbokke wat weet wat minder maak beteken. Soos verwag is daar reeds beweging binne die trop met ons jaggroeppie wat nog meer as `n kilometer weg is. Soos die vorige dag moet ons ou blesbokooie afhaal en op die meeste vyf ramme om die ram-ooiverhouding te balanseer.

My pa sê altyd dat `n goeie spreker twee sterk eienskappe het. So `n persoon het `n baie goeie geheue en die ander een kan ek nie mooi onthou nie. Die feit dat ek `n goeie spreker is en as gevolg van my ouderdom, en omtrent twee dosyn skote tussen drie .243`s en `n .270 kan ek nie alle detail van die dag onthou nie.

Nietemin, teen 14:00 is ons oeswerk voltooi en sit iets onder die hemp en herlaai batterye agter `n damwal by `n klein vuurtjie. Skillie se totaal is ses, Sniper en Albertus vyf elk en ek suig aan die agterspeen met slegs twee bokke. Afstande wissel van 30m tot anderkant more. Die een of twee kwesbokke het ons vining uitsorteer en op die misskote sal ek liefs nie uitbrei nie, maar ek moet bieg ek is onskuldig…

Laatmiddag is ons met `n draai terug huistoe en hoop om dalk `n modderbok of twee te kry met getalle wat ook in hierdie area hand uit ruk en baie skade aan veeboere se heinings en aangeplante weidings veroorsaak. Skillie kort ook `n rooiribbok op sy spesielys en ons is tussen berge, rantjies en slote in.

Bo-op die berg verander die skoon wintersdag se helder kleure vining na `n warm oranje met die son wat belangriker werk aan die westekant van moederaarde het. Die Leica teen my oë wys gou-gou vir my `n paar grys jasse wat blink in die winterson, 589m wes van ons. Skillie en Sniper is bergaf terwyl ek die episode van bo af dophou soos `n brandwag. Die twee jagters gaan lê plat in die netjiese grondpad skuins weg van die troppie ribbokke. Deur die Leica se lense sien ek weereens soos die vorige dag tussen die blesbokke, hoe die ribbokke uitmekaar spat, met die mooi ram wat bly staan in die stofwolk veroorsaak deur die koeël wat agter hom vasslaan en dan die .243 se proes wat my bereik. Skillie haal vining oor en kompenseer `n ekstra duim of twee vir die dwarswind, sy eerste rooiribbokjag is voltooi.

Die laaste dag is ons `n vreemde kamp binne met `n paar gensbokke, `n massiewe trop swart narre en klomp trekspringbokke. Dadelik is ek op die spoor van `n diknek springbokram, maar soortgelyk aan dag een kry adrenalien en opgewondenheid die oorhand en ek vergeet weereens om te kompenseer vir die 40cm wat die geniepsige suidewind wat die klein 88gr bergertjie van regs na links sal skuif en skiet loshande voor die meneer verby. Ai!

Ek bêre vir Lelik in sy sak en haal vir Finch, my 300WM met `n 27.5” loop uit. Finch spoeg `n 180gr berger elite hunter teen 3070 voete, sterker mersyne vir lawwe diere op wye afstande terwyl die suidewind poog om elke moontlik plan te bemoeilik.

Drie swart narre, twee jong bulle en oupa kom staan kort-kort duskant 300m van ons af. Dan hardloop hulle met swaaiende sterte tot buite sig en verskyn dan weer op die bult voor ons. Ek besluit om die sirkus vir eers agter te laat en na die groot trop swartwilles te beweeg vir `n oupagrootjie. Voor ek vertrek verskyn `n trekspringbokkie vanuit `n loopgraf op die vlakte van nêrens af nie. Die opdrag van die eienaar is om springbokke plat te maak terwyl ons die swart narre aandag gee. Op 220m staan sy reguit na my en kyk terwyl my regterwysvinger geleidelik die timney afdruk. Dit is haar laaste kyk met die 180gr berger wat tref waar die bors en nek bymekaar aansluit.

Met Finch se grootpratery maak die twee jonges en oupa `n fout en steek vas reg voor Sniper. Sy 300WM stuur`n whatsapp in die vorm van `n 200gr Accubond en die ou grote verdwyn in die gras. Nog `n trekbokkie klim uit `n gat langs die swart nar terwyl Sniper net die vorige whatsapp copy en paste. Plat teen die grond.

En toe begin ek stap, links, regs, op, af, heen en weer agter die sowat 60 diere aan terwyl Finch rem aan my skouer. Van staan wil hulle egter niks weet nie. Na meer as twee ure se sukkel kry die trop rustigheid. Soos ek, seker ook moeg vir die speletjie wat lankal nie meer snaaks is nie. Met behulp van my Leica sonder ons `n bul uit wat nie saam met die res bondel nie. Terselfdetyd flits `n syfer van 410m in rooi voor my oë. Uit my rugsak haal ek `n ou Huisgenoot met `n artikel wat verduidelik hoe windskuif in die jagveld toegepas word. Volgens my berekeninge behoort die 180gr berger omtrent 30cm van regs na links te skuif. Finch kry `n varsetjie in sy keel en ek konsentreer op die Leupold se fyn rooi liggie. Laag op die blad, maar 30cm agtertoe, na die middel van die lyf. Finch bokspring van opgewondenheid en dit lyk of die swart nar `n helse klap kry. Hy is plat teen die grond, maar vind sy voete en hardloop laat dit bars sonder om eintlik te vorder. Sy poeier is vir eers klaar.

Intussen volg Skillie Sniper se voorbeeld en stuur `n duidelike whatsapp na `n jonger swartwillebul. Die meneer wyer egter om sy boodskap te lees en kry `n opvolgboodskap met dieseflde woorde wat lees: `Jy moet duik ou grote`.

Weereens is ons vroegmiddag klaar gejag. Dankbaar en tevrede vir die suksesvolle paar jagdae saam met goeie mense op die Vrystaat se vrygewige vlaktes.

Met `n vleisie...

So paar kiekies volg…

[Mellies]

Kiekies...

[Mellies]

Nog...

[Mellies]

Nog...

[Dirkvh]

Baie mooi ge-griffel ou Melville, dit was 'n mooi oes en ek het nou heerlik saam met jou gejag!

[Cobus Wessels]

Darem lekker om te lees as 'n goeie spreker besluit om te skryf...

Sent from my SM-G991U1 using Tapatalk

[Lategan1]

Lekker Mellies!

Beste.

[Glocked]

Lekker geskryf daar Mellies !

Mooi gegooi daar.

[Gian_dP]

Lekker gelees! Klink of julle fantastiese tyd gehad het

Sent from my SM-G973F using Tapatalk

[ruaanb]

Lekker gelees! Dankie vir die deel!

[dawiec]

mooi geskryf en goed gejag!

[Toyrsi]

Baie geluk en mooi storie.

[Guillaume]

Lekker jag, en mooi geskryf!

[pietskiet]

n Goeie spreker het twee sterk eienskappe - classic!

Mooi geskiet Mellies, lekker storie

[honda2]

Lekker Mellies, LEKKER!

Sent from my SM-A346E using Tapatalk

[Nico de Jager]

Mooi man.